Ping, Kinuwestyon ang 'Harassment' sa Kanilang Supporters sa Manila

Ping, Kinuwestyon ang 'Harassment' sa Kanilang Supporters sa Manila

Nobyembre 12, 2021 - Kinuwestyon ni Senador Ping Lacson nitong Huwebes ang tila harassment na naranasan ng mga taga-suporta ng Lacson-Sotto tandem mula sa mga pulis sa siyudad ng Maynila.

Sinabi ni Lacson na may natanggap silang impormasyon na inutusan ng taga-Manila Police District ang mga tricycle driver at residente na may suot na Lacson-Sotto face masks na alisin ito at baligtarin.

"Bakit pinatanggal sa Manila ang face masks? The members of the Manila Police District are harassing tricycle drivers and people wearing giveaway face masks. May mali ba roon?" tanong ni Lacson.

"I know the directive did not come from Crame. Walang directive. Bakit sa Manila lang?" dagdag ng senador.

Si Lacson ay tumatakbo sa pagka-Presidente sa ilalim ng Partido Reporma habang ang kanyang ka-tandem na si Senate President Tito Sotto ay tumatakbo sa pagka-Bise Presidente sa ilalim ng Nationalist People's Coalition.

Sinabi naman ni Sotto na magbibigay sya ng kopya ng news reports ukol sa nasabing harassment sa pinuno ng PNP at Kalihim ng DILG.

Siniguro naman ni Senate finance committee chairman Juan Edgardo Angara na titignan ito ng PNP.

"Sariling katawan ng tao yan. When you put up streamers on private property it’s not a violation. What more if a person is wearing a face mask?" diin ni Lacson.

*********