DepEd, Inaprubahan ang Integrated Elementary and High School sa Pag-Asa Island sa Kalayaan

DepEd, Inaprubahan ang Integrated Elementary and High School sa Pag-Asa Island sa Kalayaan

Nobyembre 30, 2021 - Nabigyan ng pag-asa para sa isang maayos na buhay ang kabataan ng Pag-asa Island sa Kalayaan Island Group sa West Philippine Sea.

Ito ang magandang balita na dala ni Senador Ping Lacson matapos aprubahan ng Department of Education nitong Lunes ang pagkakaroon ng Pag-asa Island Integrated Elementary and High School sa susunod na school year, 2022-2023.

"Thank you, Department of Education for this: Approval of the Pag-asa Integrated Elementary and High School effective next School Year, 2022-2023. Certainly a big step of HOPE for the young people of Kalayaan," ani Lacson sa kanyang Twitter account.

Noong nakaraang linggo, sinikap ni Lacson na isulong ang pagkakaroon ng karagdagang school facilities at mga guro sa Pag-asa Island matapos malaman ang hirap na dinadanas ng mga estudyante sa lugar sa kanyang pagbisita sa isla noong Nov. 20. Ipinaglaban din ni Lacson ang karagdagang benepisyo para sa mga guro dahil sa kasalukuyan, iisa lamang ang elementary school sa lugar at dalawa lamang ang guro sa 34 na estudyante mula sa 54 na pamilya, nang walang nakikitang pagkakataon para makantuntong pa ng high school.

Dahil sa sitwasyon na ito, tila tinanggalan ang mga estudyante ng pagkakataon na makapag-high school pagka graduate nila ng Grade 6.

Ang pinakamalapit na high school ay nasa Puerto Princesa City pa sa Palawan, na umaabot ng mahigit isang araw ang byahe papunta.

Sa kadahilanang ito, isinulong ni Lacson ang pagpapatayo ng high school building o i-integrate ang high school facilities sa kasalukuyang elementary school building at magdagdag pa ng isang multigrade teacher para magturo sa high school.

Sa kabilang banda, ipinaglaban din ni Lacson ang pagkakaroon ng Special Hardship Allowance (SHA) para sa dalawang guro sa Pag-asa Island na maaari aniya na kunin mula sa badyet ng Last Mile Schools program ng DepEd.

Aniya, bagama't hindi pinapayagan sa DepEd circular ang makatanggap ng SHA ang isang guro para sa dalawang kategorya, giit ni Lacson na hindi sapat ang isang hardship allowance kada taon dahil sa dami ng hirap na kanilang nararanasan sa pagtuturo sa isla bunsod ng layo nito at kakulangan sa pasilidad.

Ani Lacson, kwalipikado sa dalawang kategorya ang dalawang guro sa isla dahil nasa isang hardship post sila at multigrade teachers.

Isinusulong ni Lacson ang "Edukasyon Plus" program para matigil na ang kahirapan sa maraming pamilyang Filipino. Sa ilalim ng programa, magbibigay ito ng libreng tuition at monthly allowance na P5,000 sa kasagsagan ng internship ng mga kwalipikadong senior high school students (Grade 11 at Grade 12) na papasok sa government internship program.

*********