Ping, Tiwala sa Kakayahan ni Eleazar na Maging Senador

 Ping, Tiwala sa Kakayahan ni Eleazar na Maging Senador

Nobyembre 14, 2021 (BACOLOD CITY) - Lubos na umaasa si Senador Ping Lacson na malaki ang magiging kontribusyon ni retired Philippine National Police chief Guillermo Eleazar kung sakaling manalo siya bilang senador sa 2022.

Sinabi ni Lacson nitong Sabado na gusto pang ipagpatuloy ni Eleazar ang kanyang pagseserbisyo sa publiko pagkatapos ng kanyang retirement bilang PNP Chief bunsod pagsapit ng kanyang ika-56 na kaarawan.

"Mukhang gusto niya. Siya na rin ang nakakaalam. Sa ngayon pagkakaalam ko gusto niya patuloy na pagsilbi sa ibang larangan," ani Lacson sa kanyang panayam sa DYHB radio.

Sa kanyang panayam, ibinahagi ni Lacson matagal nang pinag-iisipan ni Eleazar na tumakbo sa pagka-senador. Tulad ni Eleazar, si Lacson ay naging pinuno rin ng PNP mula 1999 hanggang 2001 kung saan naibalik niya ang tiwala ng taumbayan sa kapulisan.

Dagdag pa ni Lacson, noong tinanong nila ni Senate President Vicente "Tito" Sotto III si Eleazar kung ano ang kanyang plano pagkatapos ng retirement, sinabi ni Eleazar na nais nyang tumakbo sa isang elective position.

Ani Eleazar, ipinaalam niya ang planong ito kay DILG Secretary Eduardo Ano pero hindi pa ito alam ng kanyang pamilya.

Tiwala si Lacson na na kay Eleazar ang prinsipyo at katangian ng Partido Reporma sa aspeto ng matino at tapat na pamumuno sa bayan.

"Eleazar’s addition to the Partido Reporma senatorial slate reinforces the Lacson-Sotto campaign’s edge in integrity, experience and courage in public service, as they expect the former PNP Chief to bring his toughness on crime and police abuse to the Senate with respect to legislation relevant to peace and order," ayon kay Lacson.

Pinasalamatan naman ni Lacson si Paolo “Powee” Capino sa pagsama sa Lacson-Sotto tandem at Partido Reporma sa kabila ng kanyang desisyon na umatras sa laban sa pagka-senador nitong Biyernes.

"You would have represented well the PWD sector in the Senate. Nevertheless, Tito Sotto and I sincerely respect your decision. Good luck!" sabi ni Lacson sa kanyang Twitter post.

Tumatakbo si Lacson bilang pagka-Presidente sa ilalim ng Partido Reporma habang si Sotto naman ay tumatakbo bilang kanyang Bise-Presidente sa ilalim ng Nationalist People's Coalition.

Naging mainit ang pagtanggap sa kanilang tandem dito sa Bacolod City kasama ang senatoriables na sina Monsour del Rosario at Minguita Padilla.

*********